Dei viktigaste CO2-kvotane for luftfart i Europa er ikkje dei kvotane som passasjerane kjøper sjølve. Sidan 2012 har flyreiser innanfor Europa vore ein del av kvotesystemet til EU. Det inneber at SAS og andre flyselskap må kjøpe kvotar for utsleppa sine, og dersom utsleppa frå luftfarten i Europa aukar, må ein annan sektor redusere utsleppa sine tilsvarande. Sterk motstand frå USA og Kina førte til at EU måtte droppe kravet om at alle flyreiser til og frå Europa skulle inn i kvotesystemet.

Merksemda kring klimaeffekten av flyreiser er kanskje større enn utsleppa frå flytransport skulle tilseie. For Noregs del utgjer utsleppa frå flydrivstoff til sivil bruk kring 5 prosent av dei årlege klimagassutsleppa. På andre sida: Sidan dei fleste av oss brukar svært lite av tida vår på å flyge, er det ingen aktivitet som ureinar meir per time. Og fordi utsleppa frå fly skjer høgt oppe i lufta, er klimaeffekten kring 1,8 gonger så stor som for utslepp frå bakken. Frå 2002 til 2015 vart klimagassutsleppa frå fly i Noreg meir enn dobla, og det aller meste av auken kom gjennom utanlandsreiser.