Jord under press
Ketil Solvik-Olsen har skrytt av jordvernarbeidet som regjeringa har drive. Kor mykje dyrka jord som kjem til å ryke i den storstilte vegbygginga han har sett i gang, er det derimot ingen som har oversikt over.
Nye E39 mellom Ålgård i Gjesdal kommune og Hove i Sandnes kommune kjem til å gå over dyrka jord. Her kartlegg arkeologane Marianne Enoksen og Susanne Busengdal moglege kulturminne langs traseen.
Foto: Øyvind Ellingsen
Har norske styresmakter kontroll med kor mykje dyrka jord som kjem til å ryke i den storstilte samferdsleutbygginga som er i gang? Tek vi godt nok vare på dei knappe matjordressursane?
Spørsmåla er nærliggjande etter dei mange nyhendeoppslaga om veg- og jernbaneprosjekt over jorde og åkrar landet rundt dei siste månadene.
Aftenposten har fortalt om bønder i Hokksund som er tilbydde millionar for matjord som ligg der utbyggjarar vil ha jernbane med dobbeltspor. Lokalavisa Innherred i Trøndelag har skrive om lokale grunneigarar i Verdal som lagar eige forslag til vegtrasé som tek mindre dyrka jord enn traseen Statens vegvesen har føreslege, og avisa Varingen har fortalt om kornåkrar i Nittedal som skal asfalterast og verte del av riksveg 4.
Seinast førre veke vart det kjent at Statens vegvesen vil endre på ei rundt fire kilometer lang strekning av nye E39 mellom Gjesdal kommune og Sandnes kommune i Rogaland for å spare inn 500 millionar kroner. Med den føreslegne endringa legg vegen beslag på rundt 50 dekar dyrka jord i staden for 30 dekar som låg inne i den opphavlege planen. Det stadfestar Gunnar Eiterjord, som er prosjektleiar for utbygginga i Statens vegvesen.
50 dekar jord svarar til sju fotballbanar på 68 gonger 105 meter. Det vil seie sju Fifa-godkjende fotballbanar dyrka jord i byte mot nokre kilometer ny veg.
Går nedover
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
