Verda har fått ein naturavtale etter at dei 196 partane i FNs biomangfaldskonvensjon (CBD) måndag klarte å einast om ein felles tekst. Det overordna målet i avtalen er å stogge og reversere tapet av natur innan 2030. Avtalen har 23 handlingsmål. Det mest ambisiøse er 30*30-målet, som inneber at 30 prosent av hav- og landareala i verda skal vernast innan 2030.

Alle måla skal nåast innan 2030. Dei viktigaste måla er:

l Beskytte og verne 30 prosent av hav- og landareala i verda

l Underleggje 30 prosent av øydelagde naturområde restaureringstiltak

l Skaffe minst 200 milliardar dollar årleg til finansiering av naturmangfaldstiltak (dobbelt så mykje som under klimaavtalen). 30 av desse milliardane skal komme frå industrilanda

l Innan 2025 skal partane ha kartlagt subsidiar som medfører naturskade. Desse skal kuttast med 500 milliardar dollar årleg innan 2030

l Redusere overforbruket kraftig

l Halvere overgjødsling og skadeverknad av insektmiddel

l Melde inn framdrift undervegs, på same vis som i Parisavtalen for klima. Evaluering skal skje på COP17 (i 2026) og COP19 (i 2030)

l Opprette «Naturens genbank», eit informasjonssystem med fri tilgang, og etablere eit avgiftssystem for bruk av data frå genbanken. Midlane skal gå til bevaring og restaurering av natur i fattige land.

Avtalen erkjenner rolla til urfolk og lokalsamfunn som vaktarar av natur. Avtalen må gjennomførast i tråd med urfolkskonvensjonen og menneskerettslovgivinga.

Lenge var det usikkert om det var mogleg å bli samde om ein avtale. Diskusjon om detaljar i teksten hadde teke altfor lang tid. Den nest siste dagen tok det kinesiske formannskapet affære og presenterte kompromissforslag på seks vanskelege tema: avtaleteksten, måle- og indikatorsystemet, finansieringa, genbanken, kunnskapsbygginga og gjennomføringsmekanismen.

Løysinga innebar noko lågare ambisjonar, men alle partar fekk litt av det dei hadde kjempa for undervegs. Somme punkt vart fjerna, og lengda i avtaleteksten vart redusert frå 14 til 11 sider. Den namibiske representanten sa på avslutninga av møtet: «Avtaleutkastet er godt balansert og gjer alle ulukkelege. Det er løyndommen bak semje i FN-systemet.»

Avtalen vart banka gjennom seint søndag natt, sjølv om Kongo prøvde å setje ned foten.

Toppmøtet vart flytta frå Kunming til Montreal på grunn av koronasituasjonen i Kina. Derfor er det lange namnet på avtalen Kunming–Montreal-avtalen.