Nokre lesarar vil truleg sakne ei drøfting av risikoen for alvorlege biverknader av covid-vaksine i denne artikkelen. Det finst ein god del skepsis mot desse vaksinane, i Noreg som i andre land. Somme meiner auken i dødelegheit i yngre aldersgrupper frå 2021 kan forklarast med vaksinane, ikkje med covid-19.

Dette er ikkje så rart. Somme har fått alvorlege biverknader av vaksinane, inkludert hjarte- og karsjukdom. Særleg AstraZeneca-vaksinen viste seg å auke risikoen for blodpropp. Vaksinane frå Pfizer og Moderna aukar risikoen for mellom anna hjartemuskelbetennelse (myokarditt).

Når biverknadene ikkje har fått meir merksemd i Dag og Tid, er det fordi dei store studiane av temaet syner at faren for alvorlege biverknader etter vaksine er langt mindre enn faren for alvorlege etterverknader – som blodpropp – etter infeksjon.

Sidan du kan bli smitta sjølv om du er vaksinert, kan ikkje risikoen ved vaksine og smitte samanliknast direkte. Men fleire studiar tyder på at risikoen for seinfølgjer som hjarte- og karsjukdom etter infeksjon blir langt mindre om du er vaksinert.