Fleire hundre pasientar har døydd etter å ha blitt smitta med covid-19 ved sjukehusa i den australske delstaten Victoria dei siste to åra. Det går fram av ein reportasje som det statlege kringkastingsselskapet ABC publiserte 5. mai.

Data frå dei offentlege sjukehusa i delstaten viser at minst 6212 pasientar vart smitta med koronaviruset i 2022 og 2023. Av desse døydde 586 kort tid etterpå, det vil seie litt under 10 prosent av dei smitta. Victoria har litt under sju millionar innbyggarar, og er altså ikkje så ulikt Noreg i folketal.

Av dei covid-19-sjuke som har vore innlagde ved sjukehusa i Victoria, utgjorde dei som vart smitta ved sjukehusa, ein større prosentdel i 2023 enn i 2022. Kjeldene til ABC meiner dette kan forklarast med at dei fleste australske sjukehus har redusert smitteverntiltaka sine dei siste to åra. Somme av dei har gjort dette for å spare pengar, andre fordi viruset ikkje er rekna for å vere like farleg som før. Somme sjukehusleiarar seier òg at dei tilsette ikkje lenger orkar å gå med munnbind, og viser dessutan til at det er usikkert i kva grad slike tiltak hindrar smitte, skriv ABC.