Den amerikanske klimaforskaren James Hansen er ein av dei fremste talsmennene for ei karbonavgift til fordeling. På slutten av 1980-åra var NASA-forskar Hansen ein av dei første som fekk sett global oppvarming på den internasjonale dagsordenen. Dei siste åra har han først og fremst vore klimaaktivist, og han ser på KAF som det viktigaste verkemiddelet for å kunne hindre verkeleg katastrofale klimaendringar.

Prisen for å bruke fossilt brensel må ta inn samfunnskostnaden som utsleppa fører til, og til det treng vi ei karbonavgift, sa Hansen i eit intervju i Scientific American i fjor. «Men om den avgifta berre går inn til staten, gjer det staten større og hemmar økonomien.» Om ein derimot betaler ut avgifta til folk, vil det stimulere økonomien, meiner Hansen. Og berre slik kan ein sikre støtte for tiltaket i opinionen: «Den einaste måten å få folk til å akseptere ei karbonavgift, er å gje pengane attende til dei.»