Forteljingar om verda – i NoregI Afrika finn me gjerne det me leitar etter, også svolt, tørke og elende.
I Afrika finn me gjerne det me leitar etter, også svolt, tørke og elende.
Trekolseljar i Mogadishu i Somalia.
Foto: Farah Abdi Warsameh/AP/NTB scanpix
Den 19. august 1980 skreiv VG om tørke, svolt og elende på Afrikas Horn. Tittelen var: «Gigantisk nordisk Røde Kors-aksjon». Eit sitat: «Sultedød truer åtte millioner.» Dette var starten på ei rekkje norske medieoppslag om tørke, svolt og elende «der nede» – på Afrikas Horn. Historikaren Terje Tvedt viser oss mange døme på det, i essayet «Fordomar og tabu» (Dag og Tid 13. april i år).
Før og etter dette hadde eg nokre oppdrag på Afrikas Horn: i Etiopia i 1979 og 1980, så i Somalia i 1982, eit oppdrag for UNSO, eit FN-kontor i New York. I Somalia møtte eg fagfolk som arbeidde med naturressursar. Ingen av dei nemnde noko om VGs svoltkatastrofe og den gigantiske Røde-Kors-aksjonen. Var alt gløymt, etter to år? Eg såg heller ingen skjelett av daude dyr i ørkenområde eller på tørr savanne. Det var heller ikkje mitt oppdrag å finna slike døme. For journalistar er det ofte annleis: I Afrika finn me gjerne det me leitar etter, også svolt, tørke og elende.
Utpressing
På reisene såg eg på savanneskog, på trekolbrenning der og på transport av trekol og ved til Mogadishu. Det som uroa meg, var synet av store traktorar som velta ned akasietre for å rydda land for jordbruk etter sovjetisk mønster, på store, marginale landareal. Det opna opp for utturkande vind og erosjon.
Men det var framvoksteren av check points, såkalla «kontrollpostar», som gjorde meg mest uroleg. På vegane ut frå Mogadishu var det vegbommar, med væpna menn, gjerne i uniform. Dei skulle i teorien gje kontroll og orden, men i praksis tok folk med våpen og makt etter kvart over, for å driva med utpressing.
Til landet kom ein straum av krisekaravanar etter forteljingane om tørke, svolt og elende. I boka Krisekaravanen fortel Linda Polman at i Somalia måtte humanitære hjelpeorganisasjonar betala opptil 80 prosent av verdien av lasta til lokale krigsherrar for å sleppa gjennom. Dette skjedde nok seinare. Det eg såg, var nok berre starten på vonde sirklar.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
