FIS tek grep
 

I 2021 blei den svensk-britiske forretningsmannen og milliardæren Johan Eliasch vald til ny president i Det internasjonale skiforbundet. Han kom frå toppstillinga i Head-konsernet, som driv med tennisracketar og alpinutstyr. 

Eliasch såg eit stort potensial i skiidretten og ville ha ein slutt på at nasjonale forbund selde TV-rettane sine til Infront, som så selde dei vidare. Han ville ha full kontroll, og stikkordet var sentralisering. Dette har mellom anna skiskyttarane lukkast godt med.

Det blei bråk i skiforbunda, men det var nok ikkje sjølve sentraliseringsideen dei var ueinige om – det var prosessen. I slutten av april 2023 gjennomførte Johan Eliasch ei hemmeleg avstemming i FIS-styret som gav tilslutning til sentraliseringsplanen hans. Styremedlemene følte seg tekne på senga. Dette resulterte i motkoalisjonen «Snowflake», med nasjonar som Noreg, Tyskland, Sveits og Austerrike. Også Infront uttrykte skepsis til FIS sin framgangsmåte, og meinte forbundet ignorerte innarbeidde rettar og eksisterande avtaler.