Storbrannen på Melkøya 28. september blir framleis granska av Petroleumstilsynet, politiet og Equinor, og det er inga offisiell forklaring på brannårsaka. Men i november la Bellona fram sin eigen rapport om brannen, basert på kjelder ved anlegget. Der vart det hevda at ein lekkasje av varmeoverføringsolje var årsaka. Oljen skal ha teke fyr i luftinntaket til ein turbin på anlegget. Bellona hevdar òg at det har vore ei rekkje slike oljelekkasjar ved turbinane tidlegare, utan at Petroleumstilsynet har blitt varsla. Equinor har på si side sagt at Bellona ikkje har grunnlag for konklusjonen sin, og vil ikkje seie noko om årsaka før granskinga er avslutta.

Det er derimot heva over tvil at Melkøya-anlegget har hatt mange problem. I juli i fjor – altså før storbrannen – skreiv NRK at 178 uønskte hendingar var rapporterte inn til Petroleumstilsynet sidan anlegget opna i 2007. Av dette var 68 hendingar gasslekkasjar, utslepp eller brannhendingar. Fagforeininga Safe meinte låg bemanning hadde medverka til dei mange hendingane.

Frå 2017 til 2019 avdekte Petroleumstilsynet 30 avvik frå regelverket på Melkøya. Og ved eit tilsyn kort tid før brannen i september viste det seg at fleire avvik som var påpeika tidlegare, framleis ikkje var retta opp. Eitt av avvika hadde vore påpeika både i 2011 og i 2013. Båe gongene lova Statoil å rette opp feilen, men det skjedde ikkje. Likevel sa selskapet at avviket var korrigert.