I mai 2017 gjekk det ut bod frå SalMar-konsernet: Selskapet ville byggje eit nytt lakseslakteri med filetanlegg i Nord-Noreg, og kystkommunane vart inviterte til å kome med tilbod om lokalitetar som kunne oppfylle ønskelista til SalMar. Invitasjonen bad kommunane om å fortelje «hvilken infrastruktur de kunne tilby for en av de største industrisatsingene i regionens historie».

13 kommunar heiv seg inn i konkurransen, og til slutt vart Senja kåra til vinnar. Men sigeren var ikkje billeg: Senja kommune brukte heile 270 millionar kroner på å utvikle industriområdet «Klubben» for å møte spesifikasjonane til SalMar. Tomta vart utvida med sprenging og ei landfylling og fekk ny og kostbar ferskvassforsyning på tvers av ein fjord.

Da rådmannen presenterte saka for politikarane, vart det førespegla at anlegget kunne gje 350 til 400 arbeidsplassar. Så langt er det tilsett 265 arbeidarar ved det som fekk namnet Innovanor, ifølgje SalMar. Det er 103 av desse tilsette som no har fått varsel om permittering frå nyttår og fram til sommaren.