I serien «Norsk arkitektur» som gjekk i Dag og Tid 2011–2015, vart det peika på heldige og uheldige burgarkjedeetableringar i Noreg. Eg gjev att eit par minne frå reisene her:

Skiljet mellom trehussentrum med berre berekraftige verksemder kontra kjøpesenter med kjedebutikkar er mest synleg i Levanger. Levanger er spesiell i det at byen har bevart ein unik trehusarkitektur. Levanger vart i 2003 medlem av Cittaslow – ein organisasjon som byrja som ei slow food-rørsle i Italia. Men i trønderbyen sa politikarane «ja takk, begge delar». Berre eit par kilometer utanfor sentrum dukka Burger King opp – i kjøpesenteret Magneten. Burger King har ei omsetning på mange millionar i Levanger, medan Levanger sentrum har vorte omtala som «sløv by» av lokale, fordi det ikkje er liv og røre i sentrum.

På den andre sida finst det etablering av burgarkjeder midt i historiske bysentrum. To døme er McDonald’s ved Fisketorget i Bergen, som ligg i eit gamalt trehus, og McDonald’s-restauranten i Kristiansand, som ligg i den gamle bankbygningen i byen. Sistnemnde bygg hamna i 2012 på ei liste over dei tolv mest bisarre McDonalds-restaurantane i verda. Lista var laga av den britiske avisa The Mirror.