Pressestøtte

Eva Aalberg Undheim

eva@dagogtid.no

Dagbladet Pluss er skilt ut som dotterselskap av Dagbladet AS og har i år søkt om å få ein bit av pressestøttepotten som tidlegare var berre for papiraviser. Støtta, som er eit produksjonstilskot, er til for nyhende og aktualitetsmedium som «inneholder et bredt tilbod av nyhets-, aktualitets- og debattstoff fra ulike samfunnsområder», skal bidra til mediemangfald og vere retta mot vanskelegstilte medium med små opplag. I søknaden argumenterer Dagbladet Pluss for at det er eit hovudmedium som «utgir et helt annet produkt enn det Dagbladet gjør».

Klassekampen-redaktør Mari Skurdal meiner det står fram som eit skrivebordsprodukt og fryktar for framtida til pressestøtta om søknaden skulle gå gjennom.

– Kulturminister Trine Skei Grande har åtvara mot at medium tilpassar seg støtteordninga for å kome inn. Slik eg les søknaden til Dagbladet Pluss, er det det dei har gjort. Det er ingenting ved modellen deira som skil Dagbladet Pluss frå andre aviser som har lukka pluss-saker på nett – anna enn at dei kallar seg eit hovudmedium og søkjer produksjonsstøtte.

– Så du er prinsipielt imot at ein aktør som Dagbladet Pluss kjem inn under ordninga?

– Eg er ikkje prinsipielt imot at nokon sender inn ein søknad, men vi må sjå på kriteria her. Pressestøtta er laga for å kompensere for marknadssvikt, og for dei avisene som ikkje har same tilgang til reklamefinansiering som dei store. Dagbladet er eit selskap som går i pluss, det har aldri gått så godt som no, men som har skilt ut ein del av verksemda som går med nær 20 millionar i underskot. For ei avis som Klassekampen går dei store utgiftene til personal, trykk og distribusjon. Dagbladet Pluss har skyhøge driftskostnader på 63 millionar kroner som det er vanskeleg å forstå kva går til. Dei har ti tilsette, som vel vil seie rundt 10 millionar i utgifter. Resten går nok til kjøp av tenester og det dei kallar distribusjonskraft, som vil seie å vere tilgjengeleg på Dagbladets nettsider, og som dei då betaler dyrt for til Dagbladet. Så det store spørsmålet i saka er om du kan sjå på Dagbladet Pluss som eit eige hovudmedium.

– Du har sagt du fryktar kutt for Klassekampen om Dagbladet får støtte og støttepotten ikkje vert auka.

–?Når Dagbladet Pluss har eit opplag på 50.000 eller meir, kan det ta mykje frå dei andre avisene i ordninga. Pressestøttepotten har ikkje vore auka på mange år, så alle nye som kjem inn, har konsekvensar for dei andre. Men viktigare enn frykta for kutt, som jo alltid kan skje, er at eg fryktar for heile ordninga. Dersom alle mediehus kan lage ein ulønsam del av bedrifta og kalle det eit hovudmedium sjølv om det har same redaktør og vert distribuert på same nettside, kan produksjonsstøtta kome til å gjelde langt fleire enn i dag – også dei med store overskot og med stor reklamefinansiering. Det kan ha noko å seie for legitimiteten. Den politiske støtta til ordninga heng saman med at ein i dag ser det er aviser som er avhengige av støtte, som får denne.

– Klassekampen sjølv er den største mottakaren av produksjonstilskot. De fekk 43 av dei totalt 313 millionane i potten i fjor. Er det rett at ei avis i vekst skal få så mykje av støtta?

– Ordninga premierer opplag og vekst, og vi har òg lege blant dei lågaste i vår tid. Klassekampen går ikkje med enorme overskot og passar godt inn. Vi er i vekst, og jobbar hardt for annonsekronene, men ingenting av det gjev oss det overskotet Dagbladet og andre med betre annonsegrunnlag har. Får vi kutt i timillionarsklassen, kan vi ikkje lage same avis som i dag. Eg er ikkje imot at det skal kome andre inn i ordninga. Det er ei flat ordning med stor breidde, og det er òg styrken i ordninga. Men det er noko anna enn den typen modellinnovasjon Dagbladet her driv med, som kan utfordre heile ordninga. Her bør Medietilsynet vere på vakt.

– Ser du grunn til å gjere endringar i kriteria for ordninga dersom Dagbladet Pluss får støtte?

– Det kjem alt endringar og ei kraftig omfordeling frå dei større riksdekkjande meiningsberande avisene til dei minste lokalavisene. Eg meiner politikarane bør vere klare over kva dei har, kva styrke som ligg i ordninga i dag og sjå det mangfaldet produksjonsstøtta er med på å sikre i Noreg. Eg trur dei har lita forståing for kor sårbare avisene i ordninga er. No får vi ei postlov og ei mediemangfaldsmelding, samstundes med søknader om produksjonsstøtte, som kan innebere millionkutt for aviser som har svært lite å gå på. Alle desse endringane samstundes kan ramme det norske mediemangfaldet svært hardt.