Folketal

Oddgeir Havn

Professor Dag O. Hessen har skrive ein god kronikk om vippepunkt i verdas klima i Klassekampen 11. des. 2023. Det minner om at det kanskje er på tide å skrive om det største vippepunktet i mennesket si historie, som er når talet på personar på kloden når toppen og byrjar å bikke nedover.

Med stort sannsyn er det det einaste som kan stoppe menneskeskapt auke i den gjennomsnittlege temperaturen på kloden.

Det totale forbruk av energi er lik forbruk per person x talet på personar. Auken i fornybardelen av energiforbruket per person vil med stort sannsyn ikkje auke nok til å oppvege konsekvensen av auken i folketalet.

Dei sameinte nasjonar trur at folketalet i verda vil nå toppen på ca. 10,5 milliardar i slutten av vårt hundreår. På klimatoppmøte og mellom klimaaktivistar er det diverre stort sett berre fyrste delen av reknestykket (energiforbruk per person) som er på agendaen.

Det er på høg tid unge klimaaktivistar tek tak i den andre delen, som er folketalet på kloden, og prøver å framskunde vippepunktet for dette til det som kan vere realistisk, midten av vårt hundreår (ca. 2050), og då med noko over 9 milliardar.

For å få til det må slagordet bli fri abort, gratis preventiv til alle og kvinnefrigjering i tråd med Nobels fredspris 2023 i verda generelt og i Midtausten og Afrika spesielt.

Ein annan stor konsekvens av eit slikt vippepunkt, spesielt dersom folketalet går ned, er at auken i forbruket av varer vil stoppe opp, dvs. slutten på økonomisk vekst slik vi kjenner den i dag. Det vil ha enorm positiv verknad på endringa av kloden sin gjennomsnittstemperatur.

Mange meiner at utan økonomisk vekst i form av stadig auke i mengde produsert vare vil dagens samfunnssystem bryte saman.

Det kan enkelt rettast opp ved å flytte ressursbruken frå produksjon av mengde til produksjon av høgare kvalitet.