Ønskjer du å delta i debatten? Då kan du sende innlegget ditt til ordskifte@dagogtid.no
Ønskjer du å delta i debatten? Då kan du sende innlegget ditt til ordskifte@dagogtid.no
Eg les at ordføraren vår i Stavanger, Kari Nessa Nordtun, er blitt leiar av Arbeidarpartiet sitt nye energiutval. Hennar første utspel er at ho vil framskunda bygging av sterkare kraftkablar mellom Nord- og Sør-Noreg. Vona hennar er vel at dette skal redusera straumprisen her i sør.
Dessverre har vår elles gode ordførar forvilla seg ut på tynn is her. Med kombinasjonen av kraftavtalen Acer med EU og to nye sterke sjøkablar til England og Tyskland er det heilt nye reglar for kraftprisar som gjeld. Noreg er nå forplikta til å leggja fram all elkraft for sal på kraftbørsen Nordpool. Dermed må norsk kraft også kjøpast tilbake derifrå til børspris.
To faktorar har drive kraftprisen på Nordpool i vêret:
1. Marknadsprisen i Europa og England fyk opp og ned, sidan dei har gjort seg så avhengige av vind- og solkraft. Med generelt underskot på elkraft blir prisen deretter. Krigen i Ukraina har gjort stoda verre, men prisane var høge lenge før Russland sitt angrep.
2. Noreg er ein liten elkraft-aktør på den europeiske marknaden. Våre bidrag har liten eller ingen verknad på dei europeiske elkraft-prisane.
Dette siste, at Noreg er eit lite kraftland har folk vanskeleg å forstå. I årevis har politikarane og media framstilt Noreg som ei kraftkjempe – Europas batteri og så vidare. Dette er dessverre eit sjølvbedrag – eit typisk døme på «det er typisk norsk å være god»-retorikk.
Sanninga er at dersom Nord-Noreg legg nye kraftkablar sørover, så må krafta deira også seljast via Nordpool. Resultatet blir då berre at nordlendingane brått må kjøpa sin eigen straum til europeisk pris, ikkje at straumen blir billigare i sør.
Eg håper ordføraren vår snart innser dei nye reglane for kraftprissetjing, og sparar Nord-Noreg for å hamna i same uføret som me i sør er komne i.
