Krig og miljø

Tom Dybwad

Krigane i verda er ikkje med i CO2-rekneskapen for verda, ja, ikkje militærindustrien i verda heller, sjølv om militæret står for mykje av klimautsleppa i verda. Ingen tal, berre berekningar finst, men til dømes reknar ein med at militære styrker i dei fleste landa i verda står for den største delen av statleg ureining. Ifølgje Guy Kiddey, seniorrådgivar i Footprint og politisk rådgivar i Civita, er forsvarsministeren i Storbritannia ansvarleg for minst 50 prosent av dei regjeringsstyrte utsleppa i landet (Klassekampen 2. desember 2021).

Alle partane i krigane i Ukraina og Midtausten krigar og brukar store naturressursar utan tanke på klimautslepp og utan tanke på naturen. Ja, krigane skjer fullstendig i all si gru og liding utan nokon tanke på kva krigane gjer med klimaet på jorda. Heller ikkje mange media eller klimademonstrasjonar verda rundt tek opp kor skadeleg krig er for klimaet på jorda.

Dette skjer medan Noreg og EU legg aukande vekt på klimakvotar for å få ned utsleppa og gjere noko med klima. Det bør difor snarast innførast klimakvotar for å krige, og prisen må setjast så høgt at det blir for dyrt å krige, økonomisk sett. Militærindustrien i verda må påleggjast plikt til å kjøpe klimakvotar.

Regjeringa må ta dette forferdelege og brennande temaet med krig og klima på alvor, og krevje internasjonal innføring av klimakvotar for å kunne krige. Regjeringa må difor ta saka om klimakvotar for krig og for militærindustrien opp på klimatoppmøtet i Dubai frå 30. november til 12. desember i år.

Klimatoppmøtet varar i 13 dagar, og politikarane i verda bør difor ha god tid til å diskutere og få vedteke (dyre) klimakvotar for å kunne krige og for militærindustrien.

Kanskje vil det då bli for dyrt å krige? Og fred kan oppstå, til det beste for menneska, for klimaet og for naturen.