Ingen Nav-skandale, berre EØS-skandale

Det er lett å gløyme at EU og EØS hólar ut det norske demokratiet. I artikkelen til Rune Slagstad med overskrift «Utholing av demokratiet» er det sett opp ein undertittel «Nav-skandalen har retta søkjelyset mot eit demokratisk

ustyrt, elitejuridisk maktmiljø rundt Statsministerens kontor og Regjeringsadvokaten». I teksten skriv Slagstad at det har skjedd ei liberal og konstitusjonell vending som etter kvart også har nådd fram til universitetsjuristane «med aktuelle innslag knytte til Nav-skandalen i seinare tid». Slagstad skreiv at «Nav-skandalen har i det siste fått ei ny styringsjuridisk omdreiing».

Om Slagstad er ute etter å avsløra eller å motarbeida «ustyrte elitejuridiske maktmiljø», er det eit bomskot å leggja til grunn «Nav-skandalen». For påstanden om det som blir hevda å vera Nav-skandalen, gjeld det at det Stortinget har vedteke og halde fast på i årevis om vilkåra for å få ytingar, er sett til side av eit demokratisk sett særs «ustyrt elitejuridisk maktmiljø», nemleg EU-kommisjonen gjennom sine ordrekanalar EØS-avtalen og ESA-domstolen. At Stortinget sjølv har brote Grunnlova og gjeve frå seg styringsretten generelt i Noreg, og ikkje av eige tiltak eller frå hjelparane sine i Nav klarer å følgja opp konsekvensane sine eigne underordningar, gjer det ikkje til ein Nav-skandale eller ein trygdeskandale, men til ein EU-/EØS-skandale. Alt i 1884 fekk vi et parlamentarisk styringssystem i Noreg, medan EU-kommisjonen i dag styrer på føydalt vis uavhengig av folkeleg og dermed demokratisk mandat.

I til dømes 2016 var det 146.246 personar i Noreg som fekk ytt stønad i vente på mogeleg uføretrygd – arbeidsavklaringspengar – på visse vilkår. Av desse 146.246 som sa ja til vilkåra for ytinga og dermed fekk ho, fann Nav ut at 250 av dei (0,2 prosent) hadde brote vilkåra. Dei vart straffa for det, og norske domstolar sa at Nav si tolking var i samsvar med lova vedteken av Stortinget. Det er ein grunnleggjande demokratisk rett og forståing at det er norske folkevalde politikarar som skal vedta kva stønader og ytingar vi skal ha i Noreg.

At dei folkevalde gjev frå seg styringa til eit ikkje folkevalt internasjonalt organ som EU-kommisjonen, og samstundes praktiserer reglar som er i strid med EU-kommisjonens ekstreme nyliberale økonomiske usosiale politikk, gjer det ikkje rett å kalle dette ein «Nav-skandale». Slagstads «demokratisk ustyrte elitejuridiske maktmiljøet» står ikkje for ein Nav-skandale. Den demokratisk ustyrte eliten står for ein EU-/EØS-skandale.