Matkultur
Gjennomsteikt kjøt
I Dag og Tid nr. 17 skriv Dagfinn Nordbø : «Om du på død og liv må ha lammet heilt gjennomsteikt, vil eg tilrå at du et noko anna.» Dette er ei snobbete haldning, og eg ropar alarm på vegner av dei vanvitig mange som likar gjennomsteikt kjøt.
Når eg går på restaurant og bestiller biffen «well done», får eg sideblikk frå kelneren og høyrer kokken stønna heilt ute frå kjøkkenet. Han burde ha stønna av prestasjonsangst. Det er nemleg mykje vanskelegare å steika kjøtet heilt gjennom enn å steika det blodig og rosa. Kjøtet skal vera saftig samtidig som det er gjennomsteikt, men det skal sjølvsagt ikkje vera brent. Dette er ikkje enkelt å få til, og mang ein gong har eg fått gjennomsteikt kjøt som er lite appetittvekkande. Kokken får ikkje trening i kunsten å steika kjøtet skikkeleg fordi ein snobbete minoritet har lykkast med definera kjøtsmaken for oss alle.
I gode gamle dagar, då mødrer, bestemødrer og grandtanter laga søndagsmiddagen, var kjøtet alltid gjennomsteikt. Noko anna ville ha vore absurd. Kjøtet var både saftig og smakfullt utan alt det nymotens fjolleriet med blod, kvitløk og rosmarin. Me er mange som på død og liv vil ha lammet heilt gjennomsteikt, og eg vil tilrå at moderne kokkar skjerpar seg og prøver å tilfredsstilla oss.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
