Debatten

Knut Magnus Berge

Andreas Hompland og underteikna er samde om ein ting. At Fredrik Solvangs Debatten er godt TV.

Med patos svingar Andreas Hompland den retoriske pisken i Sideblikk-spalta hos Dag og Tid. At Debatten sette fattigdom på dagsordenen og inviterte fattigfolk i studio, har falle den gamle radikalaren tungt for brystet.

Godt TV, men dårleg samfunnsdebatt, er dommen.

Då er vi i alle fall samde om at Debatten er godt TV. Eg meiner det var god samfunnsdebatt også, midt i innspurten av drøftingane av statsbudsjett.

Som SVs Audun Lysbakken observerte: Det var i Debattens-studio søkelyset skifta til opplevd fattigdom under innspurten av forhandlingane om årets statsbudsjett.

Men det å sette dagsorden er visst ikkje eit vesentleg kvalitetskriterium i Homplands karakterbok. Han er mest opptatt av «dramaturgi», fattige i studio gjer at politikarane er «dømt til å tape». Mens køane hos Frelsesarmeen blir lengre og prisane stig, må Homplands «hjelparar» fram med puta når vanlege folk inntar studio. Det er sosialpornografi som polariserer. Nokon vaksne i NRK må «griba inn».

Vel, vi lyttar til råd og innspel. Og ønskjer å bli stadig betre. Eg skal ikkje kommentere alt som kjem fram på julebordet til hjelparane i Homplands originale sjanger. Men her er eit par ord om Debatten og kva NRKs debattredaksjon prøver å få til:

Debatten er ein stor fellesarena for samfunnsdebatt, ein av få vi har igjen her i landet. Det meiner vi er av demokratisk verdi. I NRKs debattredaksjon bygger vi fellesarenaer som skal famne breitt og nå mange. Dagsnytt 18, Ytring, Politisk Kvarter. Og Debatten.

Verdien av slike arenaer kan knapt overvurderast i ei tid der ekkokammeret regjerer. Fellesarenaer, felles opplevingar og felles dagsorden er knappheitsgode i 2022. Det er i kjernen av NRKs samfunnsoppdrag å legge til rette for det. Og det høyrer med i debatten om Debatten.

Å legge til rette for breie debattar på store fellesarenaer er det motsette av å polarisere, det er å inkludere. Sjølv når det provoserer.

Det er dette Fredrik Solvang og Debatten lukkast med.

Fellesarenaer må vere store, for å vere felles. Derfor må vi engasjere ­– ungt og breitt, høgt og lågt. Det er ikkje manipulasjon, det er TV-regi. Regi når det gjeld temaval, val av gjestar, oppsett i studio. Det er vår jobb å gi publikum ei best mogleg oppleving.

Tidvis har vi «vanlege folk» i studio. Levande menneske, med reelle problemstillingar, det har vi tenkt å halde fram med.

Og vi ønskjer at heile breidda av meiningar skal vere representert i Debatten. Vi vil inkludere, ikkje ekskludere, ikkje kansellere.

Debatten er ikkje eit einmannsshow. Fredrik Solvang har en redaksjon i ryggen. Alle sendingar er produkt av grundige redaksjonelle prosessar. Homplands antydning om at Debatten handlar om iscenesetting av programleiaren er feil.

Fredrik Solvang frontar NRKs journalistikk gjennom Debatten og er ein av dei beste debattleiarane Noreg har sett. I NRK er vi stolte av måten han forvaltar oppgåva og ansvaret på.

Knut Magnus Berge er
redaktør for nyhendedivisjonen
i NRK.