Næringsrik kost

I Noreg er Percy Grainger mest kjend i samband med Edvard Grieg, som forguda klaverspelet hans. Etter at dei møttest på Troldhaugen i 1907, noterte Grieg euforisk i dagboka: «Jeg måtte blive 64 År forat få høre norsk Klavermusik så forstående og genialt tolket.»

Men Grainger etterlet seg òg eit kompositorisk œuvre. Kongelige Norske Marines Musikkorps i Horten har no teke fatt på innspelinga av den samla produksjonen hans innan besetningsforma si. Kvaliteten på framføringa er ypparleg. Men sjølve musikken? Vel, arrangementa av britiske folketonar er artig gladmusikk. Men dei oversukra omarbeidingane hans av renessanse- og barokkmusikk blir for næringsrik kost for øyro mine.