Blandingsmusikk

Jakop Janssønn:

Bricoleur

Jakop Janssønn, slagverk; Håkon Aase, fiolin og kantele; Daniel Herskedal, tuba
Finito Bacalao Records

Jakop Janssønn (f. 1986) frå Tromsø er utdanna jazztrommeslagar frå Noregs musikkhøgskule i Oslo. Men som så mange av dagens yngre jazzmusikarar lagar han ein musikk som ikkje utan vidare lèt seg kategorisera i jazzens tradisjonelle stilartar. Janssønn legg heller ikkje skjul på dette, då tittelen Bricoleur tyder ein som skaper noko (til dømes musikk) av det materialet som (meir eller mindre tilfeldig) måtte vera tilgjengeleg.

Stilistisk er dette merkbart gjennom element som kan minna om folkemusikk frå mange stader i verda (inkludert ymis nordisk tradisjonsmusikk), moderne jazz og rock. På nokre stykke medverkar dessutan strykarar frå Arctic Philharmonic, som vitnar om inspirasjon frå klassisk musikk.

Den uvanlege instrumentkombinasjonen slagverk, fiolin og tuba er såleis eit sjølvsagt val når det estetiske idealet er å laga noko storslege og vakkert av uventa og kontrastfylte element.

Mange vil vera skeptiske til ei slik musikalsk tilnærming. Ofte kan resultatet liknast med det som skjer når ein svolten og hemningslaust forsyner seg av alt som er tilgjengeleg på bordet samstundes, og dermed vert overmett.

Men Janssønn går ikkje i den fella. Sjølv om det sprutar av ungdommeleg energi rett som det er, økonomiserer musikarane med verkemidla. Det er nok luft i arrangementa, elementa får tid til å utvikla seg før det dukkar opp nok nytt, og balansen mellom det stillferdige og det kraftfulle er gjennomtenkt. Musikarprestasjonane er dessutan virtuose utan å verta poserande. Dette er ein overraskande velfungerande bricolage.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.