Musikal

Steam Game Festival

Valve Corporation

Pandemien har ført til nytenking kring formidling av kunst og kultur. Når det er best å halde seg heime, er det interaktive og multimediale spelmediet ekstra relevant. Mengda speldemoar som tok for seg musikk og musikkoppleving under skyplattforma Steam Game Festival førre helg, var stor.

Medan Ambition: A Minuet In Power utforskar sosialisering og intrigar i det prerevolusjonære Paris, akkompagnert av wienerklassisistisk musikk av komponisten John Robert, kjempar ein i Klang 2 mot romrobotar ved å dirigere ein elektronisk symfoni. Det handlar om rytmisk presisjon, og utvikling av rytmesans og musikalsk oppbygging står òg på agendaen i DJ-simulatoren Hexagroove: Tactical DJ.

To spel kommenterte (kan hende utilsikta) tida vi lever i direkte med si utforsking av smale musikkmiljø gjennom interaktiv musikal. I Beauty and the Beast-pastisjen Of Bird And Cage (med musikk mellom anna av Bumblefoot frå Guns N’ Roses) trer spelaren inn i rolla som ung kvinne med ambisjon om å slå gjennom som symfonisk metalvokalist, men blir halden tilbake av traume, rusproblem og misogyni. I Strobophagia: Rave Horror går ein på skogsrave og blir utsett for skumle, manipulative narkotikaokkultistar og store mengder UV-måling, medan bassen ristar i det virtuelle råhumussjiktet.

Medan det er noko klisjéaktig ved både musikken og framstillinga av rockeklubbar og ravemiljø, skal det bli interessant å følgje med på kva fullversjonane byd på. I røynda er det uansett ikkje realistisk å bruke mykje tid i slike musikkmiljø i den nære framtida (i så fall: hald avstand, bruk maske), men demoane er heldigvis framleis tilgjengelege gratis på Steam.

Rasmus Hungnes 

Rasmus Hungnes er kunstnar, musikar og fast musikkmeldar i Dag og Tid.