CD

Marc-
Antoine Charpentier:

Les Plaisirs de Versailles

Boston Early Music Festival Vocal & Chamber Ensemble; lutt og leiing.: Paul O’Dette. CPO 2019

Innan dei nasjonale stilane frå barokken er det vel den franske som er vanskelegast å få skikkeleg til. For medan nivået på «historisk korrekte» framføringar av tysk, engelsk og italiensk barokkmusikk generelt nådde eit høgt nivå alt i byrjinga av 1980-åra, tok det minst eitt tiår til før tolkingane av den franske musikken lét naturleg, altså som verkeleg fransk stil og ikkje som stilimitasjon.

Det var franske ensemble som fyrst lukkast med dette, noko som vel har med den nære likskapen mellom det franske språket og musikken deira å gjera. For fransk barokkmusikk krev, på same måte som jazzen, ein heilt spesiell sving. Denne svingen har Boston Early Music Festival Vocal & Chamber Ensemble, som blir leia av den røynde luttspelaren Paul O’Dette. Det høyrer me på den nye plata Les Plaisirs de Versailles med to stutte operaar som Marc-Antoine Charpentier (1643–1704) komponerte for «Solkongen» Ludvig XIV’ hoff i Versailles.

Charpentier, som i dag er mest kjend som mannen bak Eurovision-fanfaren, skriv i ekte fransk operastil, der musikken er underordna dramaet, koret spelar ei viktig rolle og dei dramatiske karakterane er allegoriske: I operaen frå 1682 som har gjeve albumet namn, møter me gledene slottet i Versailles har å by på, til dømes «Musikken», «Konversasjonen» og «Spelet» (i tydinga «kortspelet»). På innspelinga til Boston-ensemblet er det – ved sida av dei gode instrumentalistane – særleg framføringa av korpartia som merkjer seg positivt ut.

Sjur Haga Bringeland