VISER

JØRN SIMEN ØVERLI TRIO:

Vidunderlig. Perler fra europeisk sangpoesi

Jørn Simen Øverli: song/gitar; Siril Malmedal Hauge: song/mandolin; Espen Leite: akkordeon
Kirkelig kulturverksted

Mange av våre fremste visesongarar framfører stort sett viser dei har laga sjølve. Slik er det ikkje med Jan Simen Øverli (f. 1950). Han har brukt det meste av tida si på å formidla andre sin songpoesi, ofte for første gong på norsk. I tillegg til å omsetja og framføra viser har Øverli dessutan vore eit hardtarbeidande organisasjonsmenneske, noko som mellom anna resulterte i at Josefine visescene vart etablert i Oslo i 1995.

Dette er den trettande plata til Øverli, også denne utgjeven i samarbeid med produsent Erik Hillestad på Kirkelig kulturverksted. Og det er atter ein gong tekstar frå «europeisk sangpoetisk kanon» som vert presenterte: av Bertolt Brecht frå Tyskland, Vladimir S. Vysotskij frå Russland og Jacques Brel frå Belgia – alt omsett av Øverlid.

Balanse

Det som karakteriserer framføringane på denne plata, er ein utsøkt balanse mellom tekstlege og musikalske element. Det er mykje luft mellom tekstfrasane, instrumenteringa er sparsam og songstilen balanserer perfekt mellom det uttrykksfulle og det edruelege.

Dei to solistane vekslar gjerne mellom å syngja annakvar linje i teksten, av og til syng dei unisont eller i parallelle tersar. Nokre stader vert den vokale klangpaletten utvida ved hjelp av gjestevokalistane Ruth Wilhelmine Meyer og Tora Augestad.

Heilskap

Også instrumentalt er det mykje å gle seg over: Øverli er utdanna klassisk gitarist (han har jamvel studert med avantgardisten Bjørn Fongaard!), og sjølv om spelet heile tida er underordna tekstformidlinga, er det ein harmonisk kompleksitet og eit teknisk overskot som imponerer. Og Espen Leites elegante melodilinjer på akkordeon smyg seg inn og ut mellom tekstfrasane på ein svært effektiv måte.

Det er ein heilskap over musikalsk framføring, tekstformidling og produksjon som gjer at desse klassiske visene framleis vedkjem oss.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.