Elektronisk
musikk

Beatrice Dillon:

Workaround

PAN

Musikken til den britiske musikaren og biletkunstnaren Beatrice Dillon er inspirert av mellom anna afrikansk rytmikk, karibisk dub og ymse variantar av elektronisk musikk, og heile debutalbumet hennar går i eit tempo på 150 slag i minuttet. Likevel læt det på ingen måte einspora.

Det er det metriske som står i sentrum her: Medan Dillon har med seg Kuljit Bhamra på dei tradisjonelle indiske trommene som heiter tabla, blir bidraga til andre gjestemusikarar i omtrent like stor grad handsama primært som perkusjon. Nokre døme er Lucy Railtons eksperimentelle cellospel, Jonny Lams (kjend frå Pharoah Sanders Band) steelgitararbeid og Griot Kadialy Kouyatés koraklimpring (kora er eit vestafrikansk bass-strenginstrument).

Melodi og harmoni spelar ei underordna rolle, og desse bidraga vert heller brukte som rytmisk krydder og gir kreativ klangfarge til ein alt rytmisk kompleks elektronisk miks.

Lydbiletet er uvant tydeleg. Der mange produsentar av elektronisk musikk tyr til effektar som reverb for å skape eit inntrykk av samanflytande fylde, har Dillon basert arbeidet sitt på gating, som i rak motsetnad avgrensar omfanget til kvar enkelt lyd og ryddar opp i støy, etterklang og brumming, slik at kvar vesle detalj får stå fram i full, krystallklar, nærast avkledd prakt. Resultatet læt ikkje som noko anna og fungerer framifrå. På Workaround er alle element ein høyrer, plasserte med høg presisjon og hensikt.

Rasmus Hungnes

Rasmus Hungnes er biletkunstnar, trommeslagar og fast musikkmeldar i Dag og Tid.