Country / soul

Yola:

Walk Through Fire

Easy Eye /
Warner

Med «Faraway Look», den første singelen frå dagsferske Walk Through Fire, har Yola laga ein av årets store låtar – ein komposisjon som med sitt store løft alt ved første gjennomlytt høyrest ut som ein klassikar, som noko folk har nynna på i fleire tiår.

For det dreier seg om musikk med ganske markante røter i poptradisjonen. Er du glad i ei plate som Dusty Springfields Dusty in Memphis (1969), til dømes, vil det vere ein god idé å gi Yola ein sjanse.

Heilstøypt

Yolanda Quartey (35), som er det fulle namnet hennar, har i ei årrekkje figurert i ulike musikkmiljø i England, og vil for somme vere kjend frå Phantom Limb og Massive Attack. Her står ho fram som ein heilstøypt singer-songwriter med sitt første soloalbum.

Walk Through Fire er spelt inn i Nashville med Dan Auerbach som produsent, og med nokre av dei beste studiomusikarane byen kan by på. (Plata vert lansert i Nashville denne helga, mellom anna med butikkonsert i den framifrå platesjappa Grimey’s i kveld.) I eit intervju Yola nyleg gjorde med Rolling Stone, fortalde ho om kva ho og Auerbach strekkjer seg etter – ein estetikk og ein lyd «det er verdt å kjempe for», det vil seie ein melodiøs, velarrangert miks av country og soul av det organiske, varme slaget, fronta av ei elegant, markant røyst.

Melodiøs miks

Yola vaks opp i vesle Portishead utanfor Bristol, og oppdaga musikken gjennom ei åleinemors nøye samansette platesamling: Aretha Franklin, The Staple Singers, Elton John og Dolly Parton har alle sine avtrykk på Walk Through Fire. Gjennom samarbeidet med Auerbach, og på nokre songar av låtskrivarlegenda Dan Penn, fann Yola samarbeidspartnarar som forstod kvar ho ville, og kunne nærme seg formative inspirasjonskjelder i sitt eige musikkuttrykk, utan at det endar opp i det stagnante retrosjiktet.

Snarare er det tale om ein særskild estetisk preferanse, basert på eit aktivt, reflektert musikkhistorisk blikk inn mot ein måte musikk har vorte laga på, ikkje ulikt det som er tilfellet på Memphis-artisten Liz Brashers nylege album på Mississippi-selskapet Fat Possum, Painted Image. I sentrum av begge desse utgivingane finn vi framifrå vokalistar med noko på hjartet, røyster som kan rykkje deg ut frå det du balar med, for ei stakka stund.

Øyvind Vågnes

Øyvind Vågnes er forfattar og fast musikkskribent i Dag og Tid.