Jazz / samtids­musikk

Christian Wallumrød Ensemble:

Many

Christian Wallumrød, piano, trøorgel og elektronikk; Eivind Lønning, trompet og elektronikk; Espen Reinertsen, saksofon, blokkfløyte og elektronikk; Tove Törngren Brun, cello og elektronikk; Per Oddvar Johansen, trommer, vibrafon og elektronikk. HUBRO HUBROCD2631

Christian Wallumrød har hatt ensemblet sitt som hovudprosjekt sidan 2003, då den fantastiske Sofienberg Variations kom ut på ECM. Noko i musikken er då som no umiskjenneleg wallumrødsk, men med Many har han utvikla uttrykket meir enn før. Han utfordrar seg sjølv, ensemblet og lyttarane i forholdet mellom komposisjon, arrangement og improvisasjon.

Besetninga er den same som på den førre Hubro-utgjevinga, Kurzsam And Fulger (2016), men no har alle fått lagt til elektronikk i instrumentariet sitt. Det gjer klangpaletten mykje rikare. Det klanglege aspektet i musikken er heilt sentralt. Ein kan gjerne finna referansar til konkret musikk eller pionerane innan elektroakustisk musikk, men for meg er det like relevant å sjå til dei mange palettvirtuosane i biletkunstsoga. Det er noko ekstremt gjennomarbeidd i det Wallumrød og medmusikantane hans held på med.

Alle dei sju stykka på plata er førte i pennen av Wallumrød, og ensemblet bidreg i varierande grad med arrangeringa, men vesentlege kvalitetar ved musikken lèt seg vanskeleg notera. Musikken er minimalistisk, utan at det seier all verda, men Wallumrød har ei sjeldan evne til å skapa spenning ved at små skifte i seriar av repetisjonar utkrystalliserer seg og blir milepålar i det musikalske forløpet. Dette er ei viktig plate.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.