Barnemusikk

Peppa Pig – Peppa’s Adventures: The Album

eOne

I fellesferien dykka eg djupare ned i onkelrolla enn nokosinne, og teiknefilmfiguren Peppa Pig, som eg blei merksam på gjennom niesa og nevøen min, lanserte sitt andre album så snart eg var tilbake ved tastaturet. Eg er interessert i barnemusikk, så Peppa’s Adventures: The Album måtte undersøkjast.

Mykje har endra seg sidan My First Album kom ut i 2019, og heldigvis har Peppa Pig følgt med i tida. Kvar dag kan vere eit eventyr uansett kvar ein er, syng ho i opningssporet, ei påminning om at ein alltids kan reise, sjølv under restriksjonar, i fantasien. Sidestillinga av resirkulering i heimen («Recycling») og privat romfart – Grampy Rabbit flyr åleine til verdsrommet i «The School Bus Song», medan ei lengtande Peppa syng «I’d fly to space if I had wings» i «North Star Lullaby» – er slåande i ei tid der ulikskapen mellom dei rike og oss andre er større og meir synleg enn nokon gong, der teknologimonopolistar som Apple gjer alt dei kan for å hindre reparasjon og resirkulering, der Amazon-Bezos flyr til rommet, der blå brennmaneter sym i Romsdalsfjorden og der trea blei haustgule i juli.

Sølepytten er eit gjentakande motiv i tekstane, og det er nærliggande å lese biletet av sprutande, tilskitna vatn som eit symbol på bittersøt sosialisering mellom pandeminedstengingane. «Bing Bong Champion», ein låt som inviterer til taktfast tramping på dansegolvet (eller i sølepytten), kan ved første øyrekast verke som eit forsvar av konkurranse og utdatert marknadslogikk, men han viser seg å vere eit opprop om samarbeid og gjensidig hjelp. Det viktigaste er å delta, og, som det vert ropt til slutt, alle er vinnerar.

Rasmus Hungnes

er kunstnar, musikar og fast musikkmeldar i Dag og Tid.