Samtidsmusikk

Dans les arbres:

Volatil

Xavier Charles, klarinett; Ivar Grydeland, elektrisk gitar; Christian Wallumrød, piano; Ingar Zach, slagverk. Sofa

Etter to plater på tyske ECM gav norske Hubro ut den tredje, medan den nyaste ikkje berre inneber nok eit skifte av plateselskap, til Sofa (også norsk); det er dessutan eit konsertopptak (frå Bologna).

Ukonvensjonelt

Og etter 150 konsertar over store deler av verda er det ikkje av vegen å høyra korleis det læt når Dans les arbres spelar med publikum til stades. Men det er stor skilnad på å sjå denne kvartetten i aksjon og berre å lyda. For sjølv om det vert spelt på velkjende instrument som klarinett, gitar, piano og slagverk, er det stort sett berre klarinetten og slagverket som av og til lagar lydar me assosierer med desse instrumenta. Stort skjuler musikarane lydkjeldene sine gjennom ukonvensjonell bruk, som til dømes preparert piano (manipulering av strengene ved å dempa dei eller stappa framandelement inn mellom dei).

Og nettopp det er noko som gjer plata gjevande å høyra på, sjølv om ei konsertoppleving der ein ser musikarane i uvanleg aksjon med instrumenta, inneber andre gode kvalitetar.

Musikarane har bakgrunn frå ulike typar moderne jazz, men dei fell ikkje for typiske freistingar som lyrisk melodikk, dramatiske utbrot eller å falla til ro i eit felles rytmisk mønster. Det er derimot tale om ein tilstand av lyd, som i dette tilfellet varer i 53 minutt. Og musikarar/plateselskap gjev oss ingen informasjon om korleis musikken er laga, eller om det finst idear bak komposisjonen.

Gode lydar

Dette læt som fri improvisasjon, men kunne like gjerne ha vore spelt etter eit strengt partitur. Men at me ikkje veit noko om bakgrunnen, gjer ingen ting. For under trea til kvartetten med det franske namnet er det rom for alle som er opne for gode lydar – uavhengig av stilartar og tradisjonar.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.