Folkemusikk

Thov G. Wetterhus:

Stålslått

Motvind Records

Det er ikkje laga mange plater med solo munnharpe. Og dette vesle instrumentet har òg sine avgrensingar: lydsvakt, grunntonebasert og lite dynamisk spelerom.

Difor er det endå meir gledeleg at Thov G. Vetterhus (f. 1982) frå Numedal har gjeve ut ei uvanleg fascinerande plate som viser kor suggererande dette vesle instrumentet kan fungera i hendene på ein svært god utøvar. At han har vunne Landskappleiken seks gonger, fortel at han er høgt akta i folkemusikkmiljøet, men denne plata vil kunna appellera til langt fleire enn ekspertane.

Det karakteristiske ved munnharpespelet er at grunntonen er konstant, den melodiske variasjonen skjer ved endringar i overtonane. Det rytmiske elementet vert utforma i samspel mellom fingerslaga mot fjøra, dei melodiske rørslene som vert laga i munnhola, og fottrampinga.

Lydteknikar Audun Strype har, i samarbeid med produsent Hans P. Kjorstad, balansert desse elementa slik at den komplekse interaksjonen mellom musikaren, instrumentet og rommet kjem tydeleg fram.

Mange av slåttane har Wetterhus lært seg etter hardingfeleopptak, og det som skjer, er ingen bleik imitasjon, men heilt nye versjonar som står støtt på eigne bein.

Det vert nytta fleire, temmeleg ulikt klingande, munnharper på plata – noko som gjev ein fin variasjon i uttrykket og lydbiletet. Denne plata kan verdsetjast av dei som alt veit ein del om munnharpespel, men samstundes er det ein framifrå presentasjon av munnharpekunsten for nye lydarar.

Sigbjørn Apeland

Sigbjørn Apeland er musikar, musikkvitar og fast meldar i Dag og Tid.