FOLKEMUSIKK

Evelina Petrova Trio:

First Dance

Evelina Petrova, trekkspel/song; Laura Ellestad, feler; Andreas Rotevatn, trombone/effektar. Heilo

Noregs musikkhøgskule i Oslo var tidlegare kjent som den mest ettertrakta norske utdanningsinstitusjonen for klassiske musikarar. Framleis står den klassiske musikken sentralt der, men i dag er skulen eit møtepunkt for utøvarar og komponistar innanfor mange musikkformer – i dette tilfellet norsk og russisk folkemusikk, element av improvisasjon, minimalisme og moderne jazz (av det lågmælte slaget, vel å merka).

Ofte er det noko søkt over alle desse merkelege samanblandingane av musikalske stilar/tradisjonar som frå før ikkje har hatt så mykje med kvarandre å gjera, men i dette tilfellet verkar det truverdig. Det kan nok ha samanheng med at eit førebilete for trioen er jazzpianisten og komponisten Misha Alperin (1956–2018), som i mange år arbeidde som professor ved Musikkhøgskulen. Og for han var det viktig å hjelpa studentane med å finna eit eige uttrykk, uavhengig av etablerte konvensjonar.

First Dance er i hovudsak basert på komposisjonar av Petrova og Alperin i tillegg til austeuropeiske folkesongar, men sett saman med element av hardingfeleslåttar og droneaktige tromboneklangar som ofte er elektronisk handsama. Syngemåten til Petrova kler dei russiske folketonane, og bakgrunnen hennar som klassisk akkordeonist – med disiplinert estetikk – kler den musikalske heilskapen.

Til saman er dette ein fascinerande vev der ingen av elementa dominerer, men smyg seg stillferdig inn og ut av kvarandre. Dette er ei vakker og verdig hylling av mentoren Alperin, men samstundes er det musikk som står trygt på eigne bein.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.