Jazz

Enrico Rava / Joe Lovano:

Roma

Enrico Rava, flygelhorn, Joe Lovano, tenorsaks og tarógató, Giovanni Guidi, piano, Dezron Douglas, bass og Gerald Cleaver, trommer. ECM 2654

Denne konsertinnspelinga for knapt eit år sidan markerer truleg byrjinga på eit meir langvarig samarbeid mellom Rava og Lovano. Nokre konsertar med Miroslav Vitous og Tony Oxley hadde ført dei saman på scenen for tjue år sidan, før dei gjennomførte ein kort turné i november i fjor. I mars neste år er det duka for fleire konsertar.

Plata byrjar med dei to velprøvde Rava-låtane «Interiors» og «Secrets». Lovano introduserer temaet på førstnemnde og gjev det ein distinkt blåfarge, før dei to blåsarane utviklar temaet og Rava tek av i eit spørsmål/svar-kor. Rava gjev stafettpinnen vidare til Guidi, og Lovano avsluttar med å utfordra kompet skikkeleg. Her er det mykje som minner om Miles Davis sin seint-60-talskvintett. Også «Secrets» er ei fantastisk plattform for improvisasjon, der Rava syner seg fram på sitt mest inspirerte. Ein litt kantete bassfigur tek oss over i Lovanos karakteristiske blues «Forth Worth», der det er komponistens tur til å slå seg laus.

Rytmeseksjonen har alt. Sjølv om dei ikkje har spelt saman som trio før, ser ikkje dette ut til å hemma dei i særleg grad. Fleksibiliteten synest å vera grenselaus. Dei demonstrerer det titt og ofte, men kanskje på sitt mest elegante i Lovanos «Divine Timing».

Plata blir avslutta med ein medley sett saman av Lovanos «Drum Song», Coltranes «Spiritual» og Harold Arlens «Over The Rainbow». Bandet greier ikkje å tilføra Coltrane-låten det drivet og den energien låten og tolkinga legg opp til, men heldigvis rundar Guidi det heile av med ei inderleg og lyrisk tolking av Judy Garlands signaturmelodi. Ei fin plate, og det blir spanande å følgja kvintetten framover.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.