Folkemusikk

Britt Pernille Frøholm:

Fokhaugen

Kviven Records

Også på denne tredje soloplata til honndølen Britt Pernille Frøholm er det tradisjonelt felespel frå Nordfjord og søre Sunnmøre som står i fokus. Men denne gongen har ho avgrensa seg til musikk som kan knytast til brørne Ole og Ivar Kjelstad frå Sunnylven.

Eldre slåttespel

Samstundes som dei forvalta det eldre slåttespelet, med springar, halling og brureslåttar, spela dei òg runddansmusikk, vals og reinlendar og var opptekne av den nasjonale dimensjonen ved folkemusikken. Ole Bull og Myllarguten var store inspirasjonskjelder.

Det meste av repertoaret på plata er funksjonell musikk – danseslåttar eller brudlaupsmusikk – men her er òg konsertmusikk. Lydarslåtten «Bjøllekua Liaros» har alle dei typiske elementa for denne nasjonalromantiske utgåva av folkemusikken. Her er flittig bruk av glidetonar høgt oppover felehalsen, sentimentale melodiske element i moll, fri rytmisk utforming og ekkoeffektar. Eit par lokale salmemelodiar har det òg vorte plass til.

I denne delen av landet har det vore vanleg å veksla mellom vanleg fele og hardingfele – noko Frøholm òg gjer. Og ho meistrar begge feletypande sikkert og med autoritet. Stilen hennar er nøktern. Ho freistar ikkje å setja sitt eige særpreg på slåttane, men er meir ute etter å formidla kjernen i dei, anten det handlar om spretne springarar eller kontemplative salmar.

Speltradisjon

Som vanleg, når det gjeld dagens folkemusikkplater, er det også her eit fyldig teksthefte med rikeleg med informasjon om speltradisjonen og små soger som er knytte til slåttane – både på norsk og på engelsk. Den fysiske versjonen av utgjevinga vert såleis meir enn berre lydreproduksjon, men ei vakker og informativ kjelde for dei som vil setja seg meir inn i denne rike musikkskatten frå Nordvestlandet.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.