Metal

Mr. Bungle:

The Night They Came Home

Ipecac

Mr. Bungle, metalsjangerens svar på Frank Zappa, har vore ein øyreopnar for mange: ein tovegs portal mellom ekstremmetal og det utvida musikkfeltet. Debutplata frå 1991 sjokkerte uskuldige lyttarar med ei kompromisslaus blanding av ska, funk, skrekkfilmatisk tivolimusikk, prog og frijazz. Andreplata Disco Volante (1995) var endå meir atonal og fri, og det svært samansette og gjennomproduserte albumet California (1999) tok den skamlause omgangen med kontrastar og klisjear til nye høgder.

Så vart det stille i eit par tiår, heilt til dei opphavlege medlemmene Mike Patton, Trey Spruance og Trevor Dunn fekk med seg Dave Lombardo frå Slayer og Scott Ian frå Anthrax på laget og returnerte til hardcore punk- og thrashmetal-røtene i bandets platekontraktlause ungdomstid. I 2020 spelte dei konsertar, gav ut ein coverversjon av punkbandet The Exploited og spelte inn og gav ut materiale frå og knytt til demokassetten The Raging Wrath Of The Easter Bunny (1986) på nytt.

Denne helga kjem The Night They Came Home, den offisielle utgjevinga av ein konsert som blei strøymd i oktober. Her framfører bandet materiale frå den nye gamle demoen i tillegg til coverversjonar av til dømes Van Halen og meksikansk folkesong.

Musikken er enklare og mindre samansett enn dei tre offisielle albuma frå 90-talet: Likevel er det ingen tvil om at det er Mr. Bungle og ikkje ei glatt supergruppe eller eit vanleg thrashband vi høyrer (og ser, dersom du til dømes vel VHS-utgåva). Musikken er framført med stor glede, og den entusiastiske energien er smittsam.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.