Hiphop

Freddie Gibbs og The Alchemist:

Alfredo

ESGN /ALC /Empire

Førre veke skreiv vi om nyutgjevinga av Gangsta Pats horrorcore-rap-klassikar Deadly Verses. Ei anna aktuell gangsta-nyutgjeving er den renoverte utgåva av dataspelet Mafia 3, der ein trer inn i rolla som afroamerikansk gangster i dei hyperrasistiske sørstatane i 1968, året Martin Luther King blei myrda. Musikken i spelet er frå 60-talet, men rasismen ein der virtuelt blir utsett for, eksisterer framleis i både openberre – jamfør Trumps stadig meir opplagde favorisering av kvite fascistar – og skjulte, systematiske former. Så for meir oppdatert mafioso-orientert musikk som rører ved tematikken, kan det splitter nye albumet til rapparen Freddie Gibbs og produsenten The Alchemist tilrådast.

På Alfredo blir omgrepet gangsta-rap handsama på bokstaveleg vis. Utgjevinga kjem med eit mafiøst spaghettiomslag, og dei djupe beatsa er spekka med samplingar av og referansar til gangsterfilmar. Lyrikken, som blir presentert med fortrollande flow, er ekstremt aktuell nett no, når medvitet kring systematisk rasisme og politivald er større enn nokosinne.

I låta «Scottie Beam», til dømes, blir tematikken handsama med referanse til Gil Scott Herons berømte song «The Revolution Will Not Be Televised»: «The revolution is the genocide, yeah, my execution might be televised», rappar Gibbs (som òg er medlem i gruppa Pulled Over By the Police). Dette er berre eitt av mange døme på liner som resonnerer enormt med – og dessutan har blitt sitert på faner under – George Floyd-protestane. Hugs òg at Eugene Ejike Obiora blei drepen av politiet i Trondheim i 2006. Det vart inga rettferd.

Rasmus Hungnes

Rasmus Hungnes er musikar, kunstnar og fast musikk­-
meldar i Dag og Tid.