Elektronisk
musikk

Fire-
Toolz:

Field Whispers (Into the Crystal Palace)

Orange Milk Records

Medan det kjenslevare hår-på-brystet-progrockebandet Tool gjentek gamle taktar på tilsynelatande ukritisk vis på Fear Inoculum, som nyleg kom ut, opererer multiinstrumentalisten Angel Marcloid som den reinaste internettidsalderantikvaren på den fjerde fullengdsplata under fana Fire-Toolz. I det omfattande audiovisuelle prosjektet til dette transfeminine ikkje-binære mennesket vert det grave og granska i den digitale samtida og nære fortida vår.

Marcloid er ein produktiv artist med mange namn. I sumar tok artisten for seg 80-talssjangrar som fusionjazz, progrock og new age på overtydande vis på plata Bubble Universe! under pseudonymet Nonlocal Forecast. Under namnet Mindspring Memories utforskar artisten meir tradisjonelle – om ein kan bruke eit slikt ord om ein knapt ti år gamal sjanger, og det kan ein vel når vi skriv 2019 – vaporwavelydcollageteknikkar. I musikken til Fire-Toolz vert alt dette blanda saman med eit aldri så lite islett metall.

Musikkvideoane, også signerte Marcloid sjølv, speglar dette eklektiske, ultramoderne uttrykket gjennom brokete, fargesprakande og intenst blinkande samanstillingar av gamle skjermspararar, gif-animasjonar, videoklipp av åndelege rettleiarar og anonymiserte saksofonistar, skrivebordsbakgrunnar og så vidare. Fire-Toolz byd på meir fiberrik kost enn det (med overlegg) glatte uttrykket til Nonlocal Forecast. For den eventyrlystne, aktive lyttaren er det mykje å meiske seg med på denne plata, der abstrakte parti av gamle ringetonar og Angel Marcloids screamovokal med eitt blir omringa av ein himmelsk hærskare av synthlydar.

Rasmus Hungnes

Rasmus Hungnes er musikar og fast musikkmeldar i Dag og Tid.