Filmmusikk

Thom Yorke:

Suspiria (Music for the Luca Guadagnino Film)

XL Recordings

Nyinnspelinga av skrekkfilmklassikaren Suspiria frå 1977 kom på norske kinoar førre helg, tre dryge veker for seint for halloween, med musikk signert Radioheads frontfigur Thom Yorke.

Saumlaust

Plata varar i 80 minutt og flyt saumlaust mellom eit vell av stilar og stemningar: I den eine augneblunken høyrest eksperimentelle, filmatiske og samtidsmusikkliknande atonalitetar, plutseleg er vi midt i Radiohead-liknande låtar framførte med Yorkes velkjende melankolske falsett, og vips, så er vi bada i lyden av sitar og halvoppklippa, triphopliknande halvshufflerytmar eller americanainspirert steelgitartwang.

Tritonusklimpring på piano går att som eit gjenferd plata gjennom, og det er her, og i låtane «Suspirium» og «Open Again» si piano- og gitarvamping, at vage ekko av Goblins originale filmmusikk kling att. Plata veks ved gjentakande gjennomlyttingar, og musikken står solid på eigne bein – sjølv for øyra til ein som ikkje enno har fått sett filmen.

To andre

To andre skrekkfilmrelaterte musikkaktualitetar verde å merke seg er John Carpenters nyinnspelte musikk til nyinnspelinga av hans eigen skrekkfilmklassikar, Halloween frå 1978, og det framifrå kunstpunkorkesteret Deerhoofs singelplate Deerhoof Plays the Music of The Shining, der vi får høyre coverversjonar av to gufs av nokre musikkstykke frå Stanley Kubricks skrekkfilmklassikar frå 1980.

Rasmus Hungnes

Rasmus Hungnes er musikar og fast musikkmeldar i Dag og Tid.