Jazz/samtids­musikk

MMO-Ensemble:

Any Day Now

Martin Myhre Olsen, sopran- og altsaks; André Roligheten, tenor- og barytonsaks og bassklarinett; Siril Malmedal Hauge, vokal; Øyvind Brekke, trombone; Erik Kimestad Pedersen, trompet; Håkon Aase og Adrian Løseth Waade, fiolin; Kaja Fjellberg Pettersen, cello; Ayumi Tanaka, piano; Karl Bjorå, gitar; Christan Meaas Svendsen, bass og vokal; Simon Olderskog Albertsen, trommer og vibrafon.
Øra fonogram OF134

Komponisten og saksofonisten Martin Myhre Olsen har verkeleg markert seg etter at han blei uteksaminert frå jazzlinja i Trondheim med ei årseining i komposisjon i 2014. Myhre Olsen har seinare vore spellemannprisnominert og kåra til «Årets unge jazzmusikar» som medlem i bandet Magalodon Collective i åra 2015 og 2016. I år blei det spellemannpris på han som medlem av kvintetten Hegge (meldt i Dag og tid 27. oktober 2017). Han er nyleg utnemnd til NTNU-ambassadør og leier Midtnorsk ungdomsstorband, men det mest spanande Myhre Olsen er involvert i for tida, er det store prosjektbandet MMO-Ensemble.

Storband med strykarar

Musikken er skriven for eit litt uvanleg «storband» som inkluderer tre strykarar. Dette er den største utgåva av ensemblet så langt. Også denne gongen inkluderer han tekstar av amerikanske lyrikarar – denne gongen Emily Dickinson, Edward Estlin Cummings og James Baldwin. Dikt av sistnemnde har gjeve namn til plata, som er eit konsertopptak frå Victoria i januar i år.

Fin dynamikk

Prosjektet profitterer på livesituasjonen. Musikarane er tydeleg inspirerte og går som ensemble frå full utblåsing til knappenålsarte parti. Det er ein utruleg fin dynamikk i bandet, men dei kan i tillegg kunsten å groova. Her set kvar einskild musikar preg på uttrykket, men utan at det går utover nerve og presisjon i ensemblespelet. Martin Myhre Olsen må vera eitt av dei mest spanande komponisttalenta i norsk jazz no om dagen.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.