Jazz

Hayden Powell:

Six Commissions

Hayden Powell, trompet; Eyolf Dale, piano; Jo Skaansar, bass
Periskop PSK107

Å spela inn eigenkomponert musikk er det vanlegaste for dagens jazzmusikarar. I tillegg blir standardrepertoaret (i stadig vidare utgåve) framleis flittig nytta. Å gjera det trioen her har gjort, å tinga musikk frå «noen av våre favorittkomponister og -musikere», er høgst uvanleg i jazzkrinsar.

Som tittelen seier, er det tale om seks tingingar frå sju ulike komponistar: Mats Eilertsen, Per «Texas» Johansson, Espen Reinertsen, Natacha Atlas / Samy Bishai, Iro Haarla og Erlend Skomsvoll. Denne lista skulle borga for både kvalitet og mangfald. I tillegg har trioen lagt inn tre improvisasjonar som ikkje berre fungerer som kontrastar, men står støtt på eigne bein.

Ensemblet får fint fram markante særdrag i komposisjonane, til dømes den rytmiske spaninga i Eilertsens «Junior Days», den «klaustrofobiske» harmonisk spaninga i Skomsvolls «Enn dét» og Eilertsens dristige pausebruk i «Vent på mitt signal». Den sistnemnde komposisjonen har gjort sterkt inntrykk – som eit slags musikalsk sakte-TV, «Big Ben minutt for minutt».

Denne Eilertsen-komposisjonen og Atlas/Bishais «Fagr Shaami» fungerer i tillegg utmerkt som springbrett for improvisatorisk utfalding. I sistnemnde slår samspelet gneistar, og Dale er i det leikne hjørnet og syner at han har plukka opp eitt og anna av salige Alperin.

Utgjevinga har vore tilgjengeleg for nedlasting i eit par månader, men eg trur det kan vera smart å venta ei veke på vinylen.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.