Folkemusikk

Knut
Hamre:

Slåttar frå Granvin

Heilo

Knut Hamre (f. 1952) er ein av våre høgst skatta hardingfelespelarar, både som tradisjonsforvaltar og svært omtykt lærar. Og han har ikkje vore redd for å samarbeida med ikkje-folkemusikarar.

På desse fire (!) CD-ane presenterer han utelukkande slåttar som har vore nytta i heimbygda Granvin, frå dei eldste me kjenner til, og til slutt: ein nykomponert springar av ein tidlegare elev, Alexander Røynstrand (f. 1990). Nokre har vore utgjevne på plate før, i ulike fasongar, men her er det berre solistisk spel, og systematikken i rekkefylgja – som for det meste er ordna etter slåttekjelder – gjev det heile preg av eit gedigent dokumentasjonsarbeid. Men samstundes er Hamre ein spelemann som set særpreg på sjølv dei enklaste slåttane. Hamre er kjend som det ein kan kalla – i mangel av eit betre ord – «kunstnarspelemann» (i motsetnad til «dansespelemann», til dømes). Likevel vert mange av slåttane framførte med ein sterk rytmisk energi.

Dei fysiske platene har fått plass bak permane i ei svært vakkert utført bok på 150 sider, der Benedicte Maurset har skrive fyldige kommentarar til musikken frå Granvin, og sambygdingen Ruth Lillegraven er representert med tre dikt som er inspirerte av folkemusikken og bygda.

Tidlegare har Hamre og Maurseth samarbeidd med plateprosjektet Rosa i botnen, der dei nytta dei aller eldste hardingfelene våre, mellom andre Jåstadfela frå 1651, og i 2014 gav dei ut samtaleboka Å vera ingenting. Denne gongen er det tale om eit dokumentasjonsprosjekt, men både boka og platene held ein kvalitet som gjer at langt fleire enn dei spesielt interesserte bør ha utbytte av å skaffa seg dette flotte monumentet over ein av våre fremste spelemenn.

Sigbjørn Apeland

Sigbjørn Apeland er musikar, musikkvitar og fast musikk-
meldar i Dag og Tid.