Elektronika

Ross From
Friends:

Aphelion

Brainfeeder

Ross From Friends er, forutan rollefiguren Ross frå TV-serien Venner for livet, artistnamnet til Felix Weatherall og tremannsorkesteret – synth og sax, gitar og elektronikk – han opptrer med live. EP-en Aphelion er debuten til den britiske artisten på den segnomsuste Los Angeles-baserte produsenten Flying Lotus’ plateselskap Brainfeeder.

Meditativt

Musikken til Ross From Friends blir gjerne omtalt som lo-fi house, ein ny sjanger innan elektronisk musikk som blandar stilelement frå klassisk house og tekno saman med samplingar og lydar assosierte med sjangrar som ambient, synthspekka funk og new age.

Bølgjeskvulp

Sporet som straks er mest fengjande, «John Cage», opnar med måkeskrik, lyden av bølgjeskvulp og ei djup, hypnotisk stemme som guidar deg inn i ein meditativ tilstand, før varme synthakkordar, rolig gitarklimpring, manipulerte stemmesamplingar og tjukke, detaljerte trommerytmar slår inn – det læt fyldig og formfullendt og er både song- og dansbart.

Delfinlydane på sporet som følgjer, er òg umiskjenneleg new age-aktige, og det heile skulle i prosessen med denne meldinga vise seg å passe som fot i hose til den solfylte bilturen til minnesmerket over verdas favorittspekkhoggar Keiko på Taknes i Halsa. Platetittelen – aphelion – tyder «solfjerne». Her på den nordlege halvkula er sumaren på sitt mest sumarlege når planeten er lengst frå sola, og denne varme, avslappande musikken er eit framifrå lydspor til den slags vêr.

Rasmus Hungnes

Rasmus Hungnes er musikar og fast musikkmeldar i Dag og Tid.