Jazz / rock /
samtidsmusikk

Møster!:

States of Minds

Kjetil Møster, tenorsaksofon, klarinett, perkusjon og trommer (B4); Hans Magnus Ryan, gitar og elektronikk; Jørgen Træen, synthesizer og lap steel gitar; Nikolai Eilertsen, bass og elektronikk; Kenneth Kapstad, trommer. Hubro HubroCD2577

Musikken til Møster! er både kompromisslaus og lett å lika. Det vert ikkje gjeve ved dørene, men samstundes vert ein oppglødd over energien, entusiasmen og det stilistiske mangfaldet. Det siste har States of Minds teke med seg frå forgjengaren When You Cut Into The Present. Dei 80 minuttane med musikk er fordelte på to CD-ar og gjev ensemblet høve til å utforska ideane i djupna.

Variert

Musikken spenner frå den tunge, støyinspirerte «Sounds Like A Planet» til det enkle lyriske i «Phantom Bandotron». Bandet spenner opp det store lerretet i dei over 20 minuttar lange «Brainwave Entertainment» og «Life Wobble», men serverer også den ultrakorte duetten «Plate Sized Eyes».

Høgdepunkt

Nytt er det i alle fall at Jørgen Træen er inkludert i ensemblet. På Vossa Jazz 2017 var Træen med i ei utvida utgåve av Møster!. Uvisst av kva grunn greidde ikkje ensemblet å servera miksen av kraft og klarleik som har prega innspelingane deira. Å lytta til Træens bidrag her blir difor ekstra gledeleg. Han utvidar klangpaletten med konduite. Lytt til platas monumentale høgdepunkt «Life Wobble», så skjønar du kor eg vil hen. Denne låten femner alt Møster! står for, og States of Minds er den beste utgjevinga deira så langt.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.