Folkemusikk

Gjertruds Sigøyner-
orkester & Britt-
Synnøve Johansen:

På reis, på reis

Britt-Synnøve Johansen, vokal; Gjertrud Økland, fiolin; Georg Reiss, klarinett/tarógató; Tom Karlsrud, trekkspel; Pål Thorstensen, bass; Helene Waage, cello; Ernest Bangó, cimbalom. Lærdal musikkproduksjon

Dette er den sjuande plata til Gjertruds sigøynerorkester. I tillegg til å forvalta ein rik musikkultur med impulsar frå mange stader i Europa, har dei tatt steget over frå å vera eit norsk ensemble som dyrkar noko fjernt og eksotisk, til å gå grundig inn i materien gjennom svært vellukka samarbeid med fleire av dei fremste representantane for sigøynar- og taterkulturen, mellom andre songaren Elias Akselsen.

Gjestesolist

Gjestesolisten denne gongen er Britt-Synnøve Johansen frå Haugesund. I utgangspunktet er ho popsongar som dei siste åra har fordjupa seg i fado, tango og musikken til Edith Piaf. Og påverknaden frå sistnemnde er svært tydeleg gjennom ein intens syngemåte, med dei karakteristiske r-ane som skarrar på ein rullande måte.

Johansen har òg omsett alle songane til norsk, og ho framfører dei på sin eigen dialekt. Songane er for det meste tradisjonelle, og nokre er alt kjende gjennom versjonar av Piaf og Piazzolla. Ein ny song har òg fått plass på plata: den fine valsen «Dans, mamma, dans» av Ragnvald Wernøe, med tekst av Johansen.

Høgt nivå

Musikarane held eit svært høgt nivå, samspelet er prega tryggleik og fullt av elegante detaljar. Men likevel: Det er songen som er i fokus her – på godt og vondt. Johansen har ei kraftfull stemme og ein svært tydeleg diksjon, men ofte vert det så intenst at syngemåten overskuggar både tekst og musikalsk heilskap. Likevel er plata ein fin presentasjon av ein musikkultur som fortener større merksemd.

Sigbjørn Apeland

Sigbjørn Apeland er musikkvitar, musikar og fast platemeldar i Dag og Tid.