Jazz

Moskus:

Mirakler

Anja Lauvdal, piano og andre tangentinstrument; Fredrik Luhr Dietrichson, bass; Hans Hulbækmo, trommer, perkusjon, vibrafon, sag og tangentinstrument. Hubro HubroCD2588

Debuten deira i 2012, Salmesykkel, vekte åtgaum, men det musikalske uttrykket låg trygt innanfor det ein forbatt med den moderne pianotrioen. Moskus seks år seinare er alt anna enn ein A4-pianotrio. Mirakler er kompromisslaus i utforskinga av det rike klanguniverset som finst i analoge tangentinstrument. Moskus er ein musikalsk parallell til den gamle fjernsynsserien Fysikk på roterommet. Musikken på Mirakler likar ein i stor grad fordi ein lar seg sjarmera av ein nesten dumdristig vilje til å eksperimentera.

Skadedyr

Plata er ei vidareføring av samarbeidet trioen hadde med Nils Økland med plata Ulv ulv (2016). Seinare har dei tre vore tungt inne i det eksperimentelle storbandet Skadedyr. Mykje tankegods frå Skadedyrs utgjeving Musikk! har funne plass i trioformat på Mirakler.

Anslag

Det er vanskeleg å dra fram høgdepunkt fordi dei sterke kontrastane i materialet er den største attraksjonen, men Hulbækmos «Min venns skaperverk» med ei frisk Carla Bley-inspirert opning er ei av rosinene i pølsa, og eg skal ikkje nekta for at «Anslag» har fått nokre ekstrarundar i CD-spelaren. Dette er ein låt som er som snytt ut or nasen på Joe Zawinul. Akkurat som Zawinul greier Moskus å sameina det enkle med den perfekte balanseringa av verkemidla. Velkomen til laboratoriet til Moskus!

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.