Verdsmusikk

Sigurd Hole Trio:

Encounters

Sigurd Hole: kontrabass, Håkon Aase: fiolin/kantele, Jarle Vespestad: trommer
Elvesang

Norske jazzmusikarar som lèt seg inspirera av ulike slag folkemusikk, finst det mange av. Somme av dei spelar saman med folkemusikarar frå ulike delar av verda, og andre låner folkemelodiar som dei utformar på sitt eige vis. Men Sigurd Hole Trio har valt å gå ein annan veg: All musikken på plata er komponert av Hole og Aase, og det er ingen gjestemusikarar som representerer «det etniske».

Einskilde element, som ornamenterte fiolinfraseringar og Vespestads bruk av til dømes handtrommer, minner av og til om ein slags ubestemmeleg midtausteninspirert musikk. Men dette er likevel ikkje pastisj eller naiv eksotisme. Musikken står på eigne bein av fylgjande grunnar: Arrangement og lydproduksjon er klår og gjennomsiktig. Kvar minste detalj frå instrumenta står tydeleg fram, og musikarane overspelar aldri. Dette er stramt og edrueleg, men utan å verta stivt og strengt. Ofte er musikken basert på relativt enkle, repeterte figurar i strengeinstrumenta, over spartansk instrumentert, men rytmisk effektiv perkusjon. Trass i eit tilbakehalde uttrykk nyttar likevel musikarane potensialet frå instrumenta sine optimalt, som strykebass i høgt register, overtonar og tremolo. Men dei er heller ikkje redde for å sleppa til ei og anna smektande melodiføring.

Ofte er prosjekt av denne typen skjemde av ein krampaktig vilje til å vere eksotisk, der gjerne dei eksotiske signala (som ikkje-vestlege skalatypar, kvarttonar og danserytmar) vert overdrivne. Men slik er det ikkje her. Dette er førsteklasses samspel av virtuose musikarar som ikkje fell for freistinga til å briljera, men held roa gjennom heile plata.

Sigbjørn Apeland

Sigbjørn Apeland er musikar, musikkvitar og fast platemeldar i Dag og Tid.