Rock

Emmerhoff & the Melancholy Babies:

Circle Six

Apollon Records

Den bergensbaserte, panvestlandske kvintetten Emmerhoff & the Melancholy Babies har halde saman sidan 1996, og Circle Six er, som namnet hintar om, det sjette studioalbumet deira.

I det forblåste opningssporet «Boreas», oppkalla etter den greske guden for nordavinden, blir 70-tals prog og psykedelisk rock krydra med eit islett svartmetall. Den mellomaldersk keltiskklingande andrelåta «Koral» er ein ballade av den heller hardtslåande sorten, medan «Aerial» er ein drøymande sumarpoplåt i silkemjuk kammerpopstil. Med «Desert Ritual» blir øyra sende ut på surfetur over vestafrikanske sanddyner mot eit metallisk ragnarok-rock-coda.

«Lovers Left Alive», truleg oppkalla etter Jim Jarmuschs vampyrdrama frå 2015, er atter ein sumarleg popsong – det læt diverre litt vel sukkersøtt, så like greitt å hoppe vidare til «BB», ein instrumental i søvnig, ørkenaktig solstikkdelirium.

«Astral Nomad» skrur tempoet opp mot himmelkvelvingen med ei spretten skarptromme som astraltrampoline, før plata landar med voggesongen «Sleepwalker».

Circle Six er samansett av element frå mang ein stilart, men læt likevel heilskapeleg. Handverket er på plass både i låtskrivar- og instrumentalistavdelinga. Etter den demografiske spreiinga – og stemninga – i publikumet på lanseringskonserten i bakgarden til platebaren Apollon i Bergen nokre veker tilbake å døme, ser musikken ut til å kunne gjere barn i alle aldrar mindre melankolske.

Rasmus Hungnes

Rasmus Hungnes er musikar og fast musikkmeldar i Dag og Tid.