Jazz

Anders Lønne Grønseth:

Multiverse

Hayden Powell, trompet; Anders Lønne Grønseth, tenor- og sopransaksofon, bassklarinett; Espen Berg, piano; Audun Ellingsen, bass; Einar Scheving, trommer.
Pling Music PLING017

Anders Lønne Grønseth kom inn på jazzscenen i byrjinga av tusenårsskiftet som ein leiande medlem i kvartetten Sphinx. Bandet gav ut fire plater og turnerte flittig.

Seinare har Grønseth gått andre vegar og engasjert seg i musikk frå Midtausten og India. I 2016 kom ei plate der han samarbeider med slidegitaristen Debashish Bhattacharya og tablaspelaren Subhasis Bhattacharya, begge frå India, og den amerikanske gitaristen Kenny Wessel, men framfor alt har Grønseth dykka djupt inn i komposisjonsfaget.

Musikalsk bagasje

Når han no er attende med ein kvintett med klassisk instrumentering, er det nettopp med mykje ekstra musikalsk bagasje som det seinaste tiåret har gjeve han.

Med seg har han Audun Ellingsen frå Sphinx-tida, den etterspurde pianisten Espen Berg og den islandske veteranen Einar Scheving på trommer.

Dei seks komposisjonane er alle førte i pennen av Grønseth, men «Holographic» er basert på Oliver Messiaens «Modes of Limited Transpostions».

Viktig plate

Sjølv om Grønseth ikkje la andre føringar enn komposisjonane, er dei så sterke og retningsgjevande at musiseringa i stor grad krinsar rundt desse. Likevel er det fleire parti der ensemblet tøyer og slit i rammene. «Excelerated Expansion» er eit strålande døme på ein slik kollektiv avstikkar. Trass i dette verkar alt som del av ein organisk heilskap.

Grønseth gjev mykje rom til den improviserte samtalen, og alle leverer vektige bidrag, men Espen Berg påkallar ekstra merksemd. Innfalla hans er doggfriske og blir gjennomførte stilsikkert, med sterk overtyding. Dette er rett og slett ei viktig plate.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.