Funk

Parliament:

Medicaid Fraud Dogg

C Kunspyruhzy Records

P-funk står for psykedelisk funk og for Parliament-Funkadelic – mellom anna. Sistnemnde er namna til dei to George Clinton-leia banda som saman står bak den karakteristiske klangen av P-Funk: funk iblanda store dosar psykedelika, rock à la Jimi Hendrix, spinnvill, absurdistisk UFO-mytologi og Sun Ra-aktig afrofuturistisk sci-fi-estetikk. Med Medicaid Fraud Dogg, den første plata under Parliament-fana på 38 år, har den gode, 76 år unge Dr. Funkenstein (som eit av Clintons pseudonym lyder) oppdatert P-Funk-sounden for det moderne musikklandskapet på intenst dansbart vis.

Den som har vore heldig nok til å oppleve Parliament-Funkadelic på konsert – ein slik kan fort vare i tre timar – er klar over at P-Funk-kollektivet veit å setje i hop lange musikalske strekk som slett ikkje er langtekkelege. Denne plata klokkar inn på bortimot to timar, og dekker eit vidt spektrum av uttrykk, frå knallhard synthbass-driven funk (til dømes singellåten «I’m Gon’ Make U Sick O’Me») til blytung, dramatisk hiphop («Mama Told Me») og hugtakande, snodige saker, som den delirisk flytande «Antisocial Media».

«One Nation Under A Groove», lyder ei av Funkadelics mest kjende strofer. Her er slagordet «One Nation Under Sedation». Det er tale om ein kritikk av farmasøytindustrien, sosiale medium og det som sløvar oss ned generelt. Medicaid Fraud Dogg foreslår funk som alternativ medisin, og albumet er ei fin lita doseringseske – både roande og oppkvikkande.

Rasmus Hungnes

Rasmus Hungnes er musikar og fast musikkmeldar i Dag og Tid.