Folkemusikk

Ursula K. Le Guin & Todd Barton:

Music and Poetry of The Kesh

RVNG Intl.

Science fiction- og fantasyforfattaren Ursula K. Le Guin døydde i januar. Den siste tida jobba ho med ei ny utgåve av Music and Poetry of The Kesh, ei musikksamling laga i samarbeid med komponistsynthisten Todd Barton, tidlegare gjeven ut på kassett saman med boka Always Coming Home i 1985. No er musikken for første gong tilgjengeleg på vinyl og i eit format som kan lastast ned.

Le Guins gjennombrotsroman Mørkets Venstre Hånd (1969, på norsk 1980), sett til ein planet der alle menneske er tvikjønna, er på same tid ei medrivande soge og lik ein presis antropologisk studie av ei utanomjordisk verd, og meistrar slik å seie bøttevis om vårt eige samfunn. Always Coming Home og Music and Poetry of The Kesh er eit liknande prosjekt, men denne gongen er det Kesh-folket, som «kan hende kjem til å ha levd ei lang, lang tid inn i framtida i Nord-California», for å parafrasere Le Guins introduksjon til boka vi får eit innblikk i.

Kesh-folket har fått eit eige språk og ein kosmologi, komplett med mytar, ritar og poesi, som Barton har laga komposisjonar ut frå. Medan kassetten originalt var meint som eit supplement til lesaropplevinga, får innspelingane – meditativ acappellasong, diktopplesing og instrumentalar framførte med nye instrument laga spesielt for høvet – her stå på eigne bein. Og møtet med musikken og poesien til dette fantasistammesamfunnet er merkeleg overbevisande, stundom nærast magisk.

Rasmus Hungnes

Rasmus Hungnes er musikar og fast platemeldar i Dag og Tid.