Fleirtydig tone

Telemark Kammerorkester gjev oss her fire verk av tre nolevande norske komponistar. Nils Henrik Asheims (fødd 1960) skifterike komposisjon Chase har det til felles med G.F. Händels Concerti a due cori at han deler orkesteret i to grupper som tevlar mot kvarandre. Mest interessant tykkjer eg Magnar Åms (fødd 1952) Studier over ein salmetone frå Luster frå 1977 er, der han tek utgangspunkt i folketonen «Dagen viker og går bort» frå Luster i Sogn. Eg lèt meg imponera over korleis komponisten både teknisk og uttrykksmessig greier å nytta den fleirtydige tonaliteten i melodien til å skapa eit originalt verk med overraskande vendingar.