Jazz/rock

FIRE!:

The Hands

Mats Gustafsson, tenor-, baryton-
og bassaks og elektronikk; Johan Berthling, bass;
Andreas Werliin, trommer og perkusjon. RUNE GRAMMOFON RCD2197

Mats Gustafsson er overalt. (Berre vår eigen Paal Nilssen-Love kan vera i nærleiken i tal på konsertar og innspelingar.) Trass i det heseblesande tempoet og dei tallause ensemblekonstellasjonane Gustafsson tek del i, greier han å melda noko viktig kvar gong.

Fire! og storbandutgåva Fire! Orchestra synest å ha høg prioritet hjå Gustafsson, og båe banda turnerer flittig det komande halvåret. Trioen har eksistert i ni år med same besetning, men har ikkje ein spesielt rikhaldig diskografi å visa til. I 2016 kom She Sleeps, She Sleeps, også denne på Rune grammofon. Med god grunn var kritikarane overbegeistra. The Hands er ei vidareføring av uttrykket frå forgjengaren, men utviklinga er tydeleg nok. Uttrykket er meir rocka.

Det er lett å finna likskapspunkt til rockelegender som Cream, Jimi Hendrix Experience og, framfor alt, Black Sabbath og dei første platene deira. Dei konstante og fengande groovane og den manipulerte basslyden i tospann med eit enkelt, men effektfullt trommekomp dannar fundamentet som Gustafsson formar saksofonmeditasjonane sine på. Oftast er monotonien hypnotiserande. Berre unntaksvis blir han keisam. I «Washing Your Heart in Filth» er grooven meir kompleks, Berthling trakterer kontrabassen på utruleg svingande vis og Gustafssons spel gjer at «Afric Pepperbird» dukkar opp i tankane. Fire! anno 2018 er framleis «on fire».

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.